ਦੇਹਰਾਦੂਨ : ਚਾਰ ਧਾਮ ਦੀ ਯਾਤਰਾ ਨੂੰ ਹੋਰ ਵੀ ਆਸਾਨ ਬਣਾਇਆ ਜਾ ਰਿਹਾ ਹੈ। ਚਾਰ ਧਾਮ ਦੀ ਯਾਤਰਾ ਕਰਨ ਵਾਲੇ ਸ਼ਰਧਾਲੂਆਂ ਨੂੰ ਪਹਿਲੀ ਵਾਰ ਇਕ ਖ਼ਾਸ ਸਹੂਲਤ ਦਿੱਤੀ ਜਾਵੇਗੀ। ਇਹ ਸਹੂਲਤ ਹੈ ਹੈਲੀਕਾਪਟਰ ਸੇਵਾ। ਹੁਣ ਤੱਕ ਉੱਤਰਾਖੰਡ ਵਿਚ ਕੇਦਾਰਨਾਥ ਧਾਮ ਲਈ ਹੀ ਹੈਲੀਕਾਪਟਰ ਸੇਵਾ ਉੁਪਲੱਬਧ ਸੀ ਪਰ ਇਸ ਵਾਰ ਯਮੁਨੋਤਰੀ, ਗੰਗੋਤਰੀ, ਕੇਦਾਰਨਾਥ ਅਤੇ ਬਦਰੀਨਾਥ ਚਾਰੋਂ ਧਾਮ ਲਈ ਹੈਲੀਕਾਪਟਰ ਸੇਵਾ ਸ਼ੁਰੂ ਕੀਤੀ ਜਾ ਰਹੀ ਹੈ। ਯਮੁਨੋਤਰੀ ਅਤੇ ਗੰਗੋਤਰੀ ਵਿਖੇ ਹੈਲੀਪੈਡ ਬਣਾਉਣ ਦਾ ਕੰਮ ਪੂਰਾ ਹੋ ਚੁੱਕਾ ਹੈ। ਇਸ ਦੇ ਨਾਲ ਹੀ ਬਦਰੀਨਾਥ 'ਚ ਹੈਲੀਪੈਡ ਪਹਿਲਾਂ ਹੀ ਮੌਜੂਦ ਹੈ। ਤਿੰਨੋਂ ਨਵੇਂ ਹੈਲੀਪੈਡਾਂ ਦਾ ਸਰਵੇ ਵੀ ਪੂਰਾ ਕਰ ਲਿਆ ਗਿਆ ਹੈ।
ਕੇਦਾਰਨਾਥ ਦੀ ਬੁਕਿੰਗ ਜਲਦੀ
ਕੇਦਾਰਨਾਥ ਧਾਮ ਲਈ ਹੈਲੀਕਾਪਟਰ ਸੇਵਾ ਦੀ ਬੁਕਿੰਗ 8 ਅਪ੍ਰੈਲ ਨੂੰ ਦੁਪਹਿਰ 12 ਵਜੇ ਤੋਂ ਸ਼ੁਰੂ ਹੋਵੇਗੀ। ਇਸ ਸਾਲ ਕੇਦਾਰਨਾਥ ਦੇ ਦਰਵਾਜ਼ੇ 2 ਮਈ ਨੂੰ ਖੁੱਲ੍ਹਣਗੇ ਅਤੇ ਉਸੇ ਦਿਨ ਤੋਂ ਗੁਪਤਕਾਸ਼ੀ, ਸਿਰਸੀ ਅਤੇ ਫਾਟਾ ਤੋਂ ਕੇਦਾਰਨਾਥ ਲਈ ਹੈਲੀਕਾਪਟਰ ਸੇਵਾ ਸ਼ੁਰੂ ਕੀਤੀ ਜਾਵੇਗੀ। ਹੈਲੀਕਾਪਟਰ ਟਿਕਟ ਬੁਕਿੰਗ IRCTC ਹੈਲੀ ਵੈੱਬਸਾਈਟ 'ਤੇ 2 ਮਈ ਤੋਂ 31 ਮਈ 2025 ਤੱਕ ਦੀਆਂ ਯਾਤਰਾਵਾਂ ਲਈ ਖੁੱਲ੍ਹੇਗੀ।
ਇਸ ਸਾਲ 5 ਫ਼ੀਸਦੀ ਵਧੇਗਾ ਕਿਰਾਇਆ
ਇਸ ਵਾਰ ਹੈਲੀਕਾਪਟਰ ਸੇਵਾ ਦਾ ਕਿਰਾਇਆ ਕਰੀਬ 5 ਫ਼ੀਸਦੀ ਵਧਿਆ ਹੈ, ਜਿਸ ਲਈ ਰਜਿਸਟ੍ਰੇਸ਼ਨ ਜ਼ਰੂਰੀ ਹੈ। ਇਸ ਦੇ ਲਈ ਯਾਤਰੀਆਂ ਨੂੰ ਸਿਰਸੀ ਤੋਂ ਬੁਕਿੰਗ ਲਈ 6,061 ਰੁਪਏ, ਫਾਟਾ ਤੋਂ 6,063 ਰੁਪਏ ਅਤੇ ਗੁਪਤਾਕਾਸ਼ੀ ਤੋਂ 8,533 ਰੁਪਏ ਦੇਣੇ ਹੋਣਗੇ।