ਕੇਂਦਰ ਸਰਕਾਰ ਨੇ ਪੈਨ ਕਾਰਡ ਯੂਜ਼ਰਸ ਲਈ ਇੱਕ ਨਵੀਂ ਚਿਤਾਵਨੀ ਜਾਰੀ ਕੀਤੀ ਹੈ। ਸਰਕਾਰ ਦਾ ਮੰਨਣਾ ਹੈ ਕਿ ਜੇਕਰ ਤੁਸੀਂ ਆਧਾਰ ਐਨਰੋਲਮੈਂਟ ਆਈਡੀ ਦੀ ਮਦਦ ਨਾਲ ਪੈਨ ਕਾਰਡ ਪ੍ਰਾਪਤ ਕੀਤਾ ਹੈ ਤਾਂ ਤੁਹਾਨੂੰ ਆਪਣੇ ਆਧਾਰ ਕਾਰਡ ਨੂੰ ਅਸਲ ਆਧਾਰ ਕਾਰਡ ਨੰਬਰ ਨਾਲ ਬਦਲਣਾ ਚਾਹੀਦਾ ਹੈ ਨਹੀਂ ਤਾਂ ਤੁਹਾਡਾ ਪੈਨ ਕਾਰਡ 31 ਦਸੰਬਰ, 2025 ਤੋਂ ਕੰਮ ਕਰਨਾ ਬੰਦ ਕਰ ਸਕਦਾ ਹੈ। ਹਾਲਾਂਕਿ, ਇਹ ਸਾਰੇ ਆਧਾਰ ਕਾਰਡ ਯੂਜ਼ਰਸ ਲਈ ਨਹੀਂ ਹੈ। ਕੇਂਦਰੀ ਪ੍ਰਤੱਖ ਟੈਕਸ ਬੋਰਡ ਵੱਲੋਂ ਇੱਕ ਨੋਟੀਫਿਕੇਸ਼ਨ ਜਾਰੀ ਕੀਤਾ ਗਿਆ ਹੈ, ਜਿਸ ਵਿੱਚ ਪੈਨ ਕਾਰਡ ਧਾਰਕਾਂ ਨੂੰ 31 ਦਸੰਬਰ, 2025 ਤੱਕ ਆਪਣੇ ਪੈਨ ਕਾਰਡ ਨੂੰ ਆਧਾਰ ਨੰਬਰ ਨਾਲ ਤਸਦੀਕ ਕਰਨ ਦਾ ਆਦੇਸ਼ ਦਿੱਤਾ ਗਿਆ ਹੈ।
ਆਮਦਨ ਕਰ ਵਿਭਾਗ ਨੂੰ ਦੇਣੀ ਪਵੇਗੀ ਜਾਣਕਾਰੀ
ਸਰਕਾਰੀ ਨੋਟੀਫਿਕੇਸ਼ਨ ਅਨੁਸਾਰ, ਸਾਰੇ ਪੈਨ ਕਾਰਡ ਧਾਰਕਾਂ ਜਿਨ੍ਹਾਂ ਨੇ 1 ਅਕਤੂਬਰ, 2024 ਤੋਂ ਪਹਿਲਾਂ ਆਧਾਰ ਲਈ ਅਰਜ਼ੀ ਦਿੱਤੀ ਹੈ ਅਤੇ ਐਨਰੋਲਮੈਂਟ ਆਈਡੀ ਦੇ ਨਾਲ ਪੈਨ ਕਾਰਡ ਲਿਆ ਹੈ, ਨੂੰ ਹੁਣ ਆਪਣਾ ਆਧਾਰ ਨੰਬਰ ਆਮਦਨ ਕਰ ਵਿਭਾਗ ਨੂੰ ਦੱਸਣਾ ਹੋਵੇਗਾ। 3 ਅਪ੍ਰੈਲ 2025 ਨੂੰ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ, ਅਜਿਹੇ ਸਾਰੇ ਪੈਨ ਕਾਰਡ ਧਾਰਕਾਂ ਨੂੰ 31 ਦਸੰਬਰ 2025 ਤੱਕ ਆਪਣੀ ਜਾਣਕਾਰੀ ਦੇਣੀ ਪਵੇਗੀ।
ਪੈਨ-ਆਧਾਰ ਕਾਰਡ ਲਿੰਕ
ਪੈਨ ਕਾਰਡ ਨੂੰ ਆਧਾਰ ਨੰਬਰ ਨਾਲ ਲਿੰਕ ਕਰਨ ਲਈ ਪੈਨ-ਆਧਾਰ ਲਿੰਕ ਕਰਨ ਦੀ ਮੌਜੂਦਾ ਪ੍ਰਕਿਰਿਆ ਦੀ ਵਰਤੋਂ ਕੀਤੀ ਜਾਵੇਗੀ। ਪੈਨ ਕਾਰਡ ਧਾਰਕ ਨੂੰ ਆਮਦਨ ਕਰ ਵਿਭਾਗ ਦੇ ਈ-ਫਾਈਲਿੰਗ ਪੋਰਟਲ 'ਤੇ ਜਾ ਕੇ ਪੈਨ-ਆਧਾਰ ਲਿੰਕਿੰਗ ਪ੍ਰਕਿਰਿਆ ਨੂੰ ਪੂਰਾ ਕਰਨਾ ਹੋਵੇਗਾ। ਹਾਲਾਂਕਿ ਪੈਨ ਆਧਾਰ ਨੂੰ ਲਿੰਕ ਕਰਨ ਦੀ ਆਖਰੀ ਤਾਰੀਖ 30 ਜੂਨ 2023 ਸੀ ਅਤੇ ਹੁਣ ਤੁਹਾਨੂੰ ਅਜਿਹਾ ਕਰਨ ਲਈ ਜੁਰਮਾਨਾ ਭਰਨਾ ਪੈ ਸਕਦਾ ਹੈ ਪਰ ਜਿਨ੍ਹਾਂ ਲੋਕਾਂ ਨੇ ਐਨਰੋਲਮੈਂਟ ਆਈਡੀ ਰਾਹੀਂ ਪੈਨ ਕਾਰਡ ਪ੍ਰਾਪਤ ਕੀਤਾ ਸੀ, ਉਨ੍ਹਾਂ ਕੋਲ ਉਸ ਸਮੇਂ ਆਧਾਰ ਨੰਬਰ ਨਹੀਂ ਸੀ। ਇਸ ਲਈ ਅਜਿਹੇ ਪੈਨ ਕਾਰਡ ਧਾਰਕ 2023 ਦੀ ਆਖਰੀ ਮਿਤੀ ਦੇ ਅੰਦਰ ਲਿੰਕਿੰਗ ਨਹੀਂ ਕਰ ਸਕਦੇ ਸਨ। ਉਨ੍ਹਾਂ ਪੈਨ ਕਾਰਡਾਂ ਨੂੰ ਜੁਰਮਾਨੇ ਤੋਂ ਛੋਟ ਮਿਲ ਸਕਦੀ ਹੈ।
31 ਦਸੰਬਰ 2025 ਤੱਕ ਆਧਾਰ ਨਾ ਦੇਣ 'ਤੇ ਕੀ ਹੋਵੇਗਾ
ਜੇਕਰ ਤੁਸੀਂ ਪੈਨ ਕਾਰਡ ਧਾਰਕ ਹੋ ਅਤੇ 31 ਦਸੰਬਰ 2025 ਤੱਕ ਪੈਨ ਨੂੰ ਆਧਾਰ ਨੰਬਰ ਨਾਲ ਨਹੀਂ ਜੋੜਦੇ ਹੋ ਤਾਂ ਇਹ ਸੰਭਵ ਹੈ ਕਿ ਪੈਨ 1 ਜਨਵਰੀ 2026 ਤੋਂ ਅਕਿਰਿਆਸ਼ੀਲ ਹੋ ਸਕਦਾ ਹੈ ਪਰ ਇਸਦੀ ਪੂਰੀ ਜਾਣਕਾਰੀ ਆਮਦਨ ਕਰ ਵਿਭਾਗ ਤੋਂ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਜੇਕਰ ਸਰਕਾਰ ਵੱਲੋਂ ਪੈਨ ਅਤੇ ਆਧਾਰ ਨੂੰ ਲਿੰਕ ਨਹੀਂ ਕੀਤਾ ਜਾਂਦਾ ਹੈ ਤਾਂ 1,000 ਰੁਪਏ ਦਾ ਜੁਰਮਾਨਾ ਭਰਨਾ ਪੈ ਸਕਦਾ ਹੈ।