ਨਵੀਂ ਦਿੱਲੀ : ਵੀਰਵਾਰ ਨੂੰ ਜਾਰੀ ਕੀਤੀ ਗਈ ਇਕ ਰਿਪੋਰਟ ਮੁਤਾਬਕ ਵਿਸ਼ਵਵਿਆਪੀ ਅਨਿਸ਼ਚਿਤਤਾਵਾਂ ਦੇ ਵਿਚਕਾਰ 2025 ਦੀ ਸ਼ੁਰੂਆਤ ਹੋਣ ਦੇ ਨਾਲ ਭਾਰਤ ਦੀ ਅਰਥਵਿਵਸਥਾ ਮਜ਼ਬੂਤ ਸਥਿਤੀ ਵਿਚ ਹੈ। ਬੈਂਕ ਆਫ ਬੜੌਦਾ (BOB) ਦੀ ਰਿਪੋਰਟ ਮੁਤਾਬਕ ਦੂਜੀ ਤਿਮਾਹੀ ਦੇ ਮੁਕਾਬਲੇ ਤੀਜੀ ਤਿਮਾਹੀ ਵਿਚ GST ਸੰਗ੍ਰਹਿ, ਸੇਵਾ ਖਰੀਦ ਪ੍ਰਬੰਧਕ ਸੂਚਕਾਂਕ, ਹਵਾਈ ਯਾਤਰੀ ਵਾਧੇ ਅਤੇ ਵਾਹਨ ਰਜਿਸਟ੍ਰੇਸ਼ਨ ਵਿਚ ਮਹੱਤਵਪੂਰਨ ਸੁਧਾਰ ਦੇਖਿਆ ਗਿਆ।
ਮੈਨੂਫੈਕਚਰਿੰਗ ਸੈਕਟਰ ਹੌਲੀ-ਹੌਲੀ ਫੈਲ ਰਿਹਾ ਹੈ। ਦੂਜੇ ਪਾਸੇ ਚੀਨ ਵਿਚ ਜਦੋਂ ਨਿਰਮਾਣ ਖੇਤਰ ਹੌਲੀ-ਹੌਲੀ ਫੈਲ ਰਿਹਾ ਹੈ, ਘਰੇਲੂ ਖਪਤ ਨੂੰ ਹੁਲਾਰਾ ਦੇਣਾ ਅਤੇ ਰੀਅਲ ਅਸਟੇਟ ਸੈਕਟਰ ਨੂੰ ਮੁੜ ਸੁਰਜੀਤ ਕਰਨਾ ਪ੍ਰਸ਼ਾਸਨ ਲਈ ਇਕ ਮੁਸ਼ਕਲ ਕੰਮ ਸਾਬਤ ਹੋ ਰਿਹਾ ਹੈ। ਅਮਰੀਕੀ ਅਰਥਵਿਵਸਥਾ ਵਿਕਾਸ ਨੂੰ ਲੈ ਕੇ ਮਿਲੇ-ਜੁਲੇ ਸੰਕੇਤ ਦੇ ਰਹੀ ਹੈ। ਜਦੋਂ ਕਿ ਲੇਬਰ ਮਾਰਕੀਟ ਨਰਮ ਅਤੇ ਨਿਰਮਾਣ ਗਤੀਵਿਧੀ ਕਮਜ਼ੋਰ ਦਿਖਾਈ ਦਿੰਦੀ ਹੈ। ਪਰਚੂਨ ਵਿਕਰੀ, ਬਕਾਇਆ ਰਿਹਾਇਸ਼ੀ ਵਿਕਰੀ ਅਤੇ ਸੇਵਾ ਖੇਤਰ ਵਧੀਆ ਪ੍ਰਦਰਸ਼ਨ ਕਰ ਰਹੇ ਹਨ। ਯੂਰਪ ਵਿਚ ਨਿਰਮਾਣ ਗਤੀਵਿਧੀ ਨੇ ਅਜੇ ਵੀ ਰਫ਼ਤਾਰ ਨਹੀਂ ਫੜੀ ਹੈ, ਜਦੋਂ ਕਿ ਸੇਵਾ ਖੇਤਰ ਆਪਣੀ ਸਥਿਤੀ ਵਿਚ ਆ ਰਿਹਾ ਹੈ।
ਬੈਂਕ ਆਫ ਬੜੌਦਾ ਦੇ ਅਰਥ ਸ਼ਾਸਤਰੀ ਸੋਨਲ ਬੱਧਨ ਨੇ ਕਿਹਾ ਕਿ ਸਾਲ ਦੇ ਅਖ਼ੀਰ ਦੇ ਬਾਜ਼ਾਰ ਵਿਸ਼ਲੇਸ਼ਣ ਤੋਂ ਪਤਾ ਲੱਗਦਾ ਹੈ ਕਿ ਸੈਂਸੈਕਸ ਅਤੇ ਨਿਫਟੀ 50 ਦੋਹਾਂ ਨੇ ਕਲੰਡਰ ਸਾਲ 24 ਵਿਚ 8.7 ਫ਼ੀਸਦੀ ਅਤੇ 9 ਫ਼ੀਸਦੀ ਦਾ ਵਾਧਾ ਦਰਜ ਕੀਤਾ। ਸੈਂਸੈਕਸ ਨੇ ਇਸ ਸਾਲ ਹੁਣ ਤੱਕ ਦਾ ਸਭ ਤੋਂ ਉੱਚਾ ਪੱਧਰ ਛੂਹਿਆ ਅਤੇ 85,500 ਦੇ ਅੰਕੜੇ ਨੂੰ ਪਾਰ ਕਰ ਗਿਆ ਹੈ। ਹਵਾਈ ਯਾਤਰੀਆਂ ਦੀ ਗਿਣਤੀ ਵਿਚ ਤੀਜੀ ਤਿਮਾਹੀ ਵਿਚ 11.6 ਫ਼ੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ, ਜਦਕਿ ਦੂਜੀ ਤਿਮਾਹੀ ਵਿਚ 7.8 ਫ਼ੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਸੀ। ਤੀਜੀ ਤਿਮਾਹੀ ਵਿਚ ਸੇਵਾ ਪੀ. ਐੱਮ. ਆਈ. ਔਸਤਨ 59.2 ਰਹੀ, ਜਦਕਿ ਪਿਛਲੇ ਸਾਲ ਇਸੇ ਸਮੇਂ ਦੌਰਾਨ ਇਹ 58.1 ਸੀ। ਬੱਧਨ ਨੇ ਅੱਗੇ ਕਿਹਾ ਕਿ ਸਾਨੂੰ ਉਮੀਦ ਹੈ ਕਿ ਤਿਮਾਹੀ ਕਾਰਪੋਰੇਟ ਨਤੀਜਾ ਵੀ ਤੀਜੀ ਤਿਮਾਹੀ ਵਿਚ ਬਿਹਤਰ ਪ੍ਰਦਰਸ਼ਨ ਵਿਖਾਉਣਗੇ।